Te rangahau, te arotake me ngā hua
Ko tā Te Mātātupu, he whakatū i tētahi puna o ngā taunaki me ngā mātauranga hei tautoko i ngā whakataunga huri noa i Te Mātāwai me te rāngai whānui o te reo Māori. Ka tuku pūrongo hoki tēnei rōpū e pā ana ki te ahunga whakamua o ngā putanga o te rautaki o Maihi Māori. Ka whakapuakina ngā kitenga o ngā rangahau me ngā arotake ki ngā kaiwhaipānga matua, pērā i ngā whānau, i ngā mātua, i ngā mema o te hapori, i ngā marae, i ngā hapū, i ngā kaiārahi o ngā iwi me ngā toa reo Māori, kātahi ka tino whai hua. Nō reira, he mea nui te pānuitanga atu, te whakatairangatanga me te tāpaenga atu o ēnei kōrero, ki te taha o ngā pūrongo rangahau me ngā wheako mahi.
Hei kanohi a Te Mātātupu mō Te Mātāwai, ā, he kaikōkiri hoki nō te rōpū o Te Rangakura, he mea whakatū ki raro i Te Whare o te Reo Mauriora. He rōpū rangahau a Te Rangakura e hāpai ana i te mahi ngātahi, i te pānuitanga atu hoki o ngā kōrero ki waenga i ngā tari kāwanatanga e kawe ana i ngā take e pā ana ki te reo Māori me Te Mātāwai.
