Te whakatakoto i te mahere
Me aronui, me āta whakariterite hoki tātou kia tae atu tātou ki Hawaiki Mokopuna hei te tau 2040. Mai i te Tauākī Whāinga o ngā tau 2021– 2024, kua huri atu mātou i ngā wāhanga matua e rima ki ngā whāinga tōmua e rua: ko te Tukuihotanga, e aronui ana ki te whāngaitanga atu o te reo ki ngā uri whakaheke me te Hononga Hapori Reo, e aronui ana ki te tūhonohonotanga atu o ngā rōpū e kōrero ana i te reo. Nā, kua whakahāngaihia tō mātou rautaki kia āhei a Te Mātāwai ki te whai i ngā putanga e anga atu ana ki ngā whāinga roa a te Maihi Māori.
Hei ngā tau e haere mai ana, ka auau te whakaritea o ngā arotake motuhake kia āta kitea ngā kokenga whakamua, kia whakatikaina hoki te rere o te waka i a mātou e haere ana.
Ko te tauranga tuatahi, ko Hawaiki Tipuna, ā, ka tū tēnei wāhanga o te haerenga mai i tēnei wā tonu tae atu ki te tau 2027.
Ka whakatata atu mātou ki Hawaiki Mokopuna, kāore e kore, ka huri ā mātou whāinga tōmua i a mātou e mātai atu ana ki ngā kāhui whetū o te wā. Me mārama hoki Te Mātāwai me te Karauna ki ngā tohu o te ora me te mate o te reo Māori i a mātou e whai ana i tēnei ara. Kei tō mātou tauira whakahaere tētahi anga e whakatakoto ana i ngā putanga tōmua me ngā mahi tautoko a ō mātou hoamahi ki ngā kāinga, ki ngā hapori me ngā iwi. Kei te whai kaha mātou i ō mātou pūkenga me ō mātou wheako hei āwhina i tō mātou terenga atu ki Hawaiki Mokopuna.
E whakatere atu ana ki Hawaiki Tipuna 2027
Kua toroa ngā pūnaha o te Karauna me te Kāwanatanga, ā, kua tū tētahi kaupapa e whakakaha ake ana i te mana me ngā kawenga o te Māori mai i tō mātou whakatūnga i te tau 2017. Ko Hawaiki Tipuna te wā tuatahi ka āhei a Te Mātāwai ki te āta titiro atu ki te whānui o ngā mahi ki ngā kāinga, ki ngā hapori me ngā iwi; he tirohanga Māori tēnei me te tirohanga o te hoamahi o te Karauna ki te motu whānui. Hei te taenga atu ki Hawaiki Tipuna ka tautohu a Te Mātāwai i ngā mahi tōmua hei whai, hei whakaū hoki tae noa ki te tau 2040, arā, koinei te tauira mahi ‘tōtika’ hei whakatutuki i te whāngaitanga atu o te reo Māori ki ngā uri whakaheke me te pikinga ake o te hauora o te whānau.
