Kei waenga i ngā pohutu, i ngā ngāwhā me ngā wai hū o Rotorua, kei te whakaarahia ake te reo o te whānau e Ngāti Whakaue mā te kura reo Māori.
E pūmau ana tēnei iwi ki te whakarauoratanga mai o te reo, ā, ko te kura reo tētahi o ngā kaupapa huhua mā ngā uri, pērā i te kura kōeke (he akoranga reo mā ngā kaumātua), i te wānanga paepae me te wānanga rangatahi. He wāhi anō ēnei kaupapa whakapakari i te reo o ngā whānau, o te whakakitenga rautaki a te iwi, arā, “kia toru ngā rārangi o te paepae”. Mā ēnei kaupapa ka whakaorahia ake, ka whakapūmautia te reo Māori o Ngāti Whakaue, e ora tonu ai te reo mā ngā uri whakaheke.
He mea whakatū te Kura Reo o Ngāti Whakaue e te rōpū ā-iwi o Te Taumata o Ngāti Whakaue, kia ora anō, kia tiakina hoki te reo Māori e tōna iwi. Hei reira, ka whakaakona te hunga e tauhou ana ki te reo me te hunga matatau, otirā, ko ngā taumata reo katoa.
Mā te Kura Reo ka whakaara ake te whakamahinga, te kounga me te mana o te reo i roto i ngā kāinga, i ngā hapori, i te marae me ngā wāhi ako. E whakahāngaihia ana ngā Kura Reo ki te Rautaki Iho Ake 2035, e whai ana kia whakakahangia te reo i roto i ngā kāinga me ngā hapori.
Ko te whāinga matua o Te Kura Reo o Whakaue, he whakawhanake, he whakahōhonu ake i te mātauranga, i te reo, i te whakapapa me te tuakiri o ngā uri o ngā hapū, o te iwi me ngā marae o te hapori. Kei te whakapiki ake hoki tēnei i te kounga me te whakamahinga o te reo o Ngāti Whakaue, kia kitea, kia rangona te reo ki roto, ki waho atu anō o ēnei kaupapa.
Kei te aronui te Kura Reo ki ngā wawata o ngā whānau, ki ngā kōrero tuku iho, ki ngā hui rumaki reo, ki te whakaputanga o ngā rauemi, ki ngā rautaki reo Māori me ngā tūhonotanga i waenga i ngā reanga rerekē me te mana Māori motuhake. Kei te whāia ngā huarahi maha kia kuhu mai te iwi whānui.
