Tekau maa tahi ngaa waananga karanga i tuu ki te marae o Kohinga Maarama me Maketuu, araa, he hui ahurei eenei e rangona tuatahi ai ngaa reo karanga o eenei waahine.
Ka tuu kaha ngaa waahine ki te tuku atu i oo raatou karanga tuatahi ki oo raatou ake marae, i whakawhaanuihia hoki te puna kupu me te maaramatanga o te hunga e taunga ana ki te karanga.
Kei te takiwaa o te tokorima ki te 12 ngaa waahine i tae mai ki eenei waananga, aa, ka manaakihia, ka arahina hoki teenaa me teenaa i runga i te ngaakau atawhai. Ka whaangaia raatou ki ngaa kupu e haangai ana ki te karanga. I reira anoo ngaa tohunga
e whakamaarama ana i te huhua o ngaa kaupapa peeraa i te reo o te karanga, i te taha wairua o te karanga, i ngaa koorero moo ngaa atua me ngaa puukenga motuhake o te whakaputanga tika o te reo karanga.
Naa te waananga nei ka tuuhonohono atu anoo ngaa waahine ki oo raatou marae, aa, ka rongo hoki raatou i te mana, i te wehi me te tapu o te karanga. Hei taa te nuinga o ngaa waahine, kua piki ake too raatou kaha me too raatou maaia ki te karanga ki runga i oo raatou marae. Ka whakapakarihia te reo o te hunga e moohio ana ki te karanga, aa, ka whakaawea hoki teetahi reanga hou ki te haapai i teenei mahi tuku iho.
He waahi nui too te kaupapa o Te Reo Karanga o te Maareikura ki te tiaki i te reo me te maatauranga Maaori e paa ana ki te karanga. Ka piki ake hoki te hiahia ki te ako i ngaa aahuatanga katoa o teenei mahi tuku iho. He hui manaaki, kia kimi noa te waahine i toona anoo reo, otiraa, ki te hapa, ka kore e whakahaawea. He hui aahuru e maatoro atu ai te tangata ki te reo, ki te maatauranga me ngaa atua Maaori i runga i te wairua pai.
Ko teetahi o ngaa koorero i hua mai, me whakarite te waataka moo ngaa waananga karanga i mua raa anoo o te hui.
I whakatuuria teenei hui i runga i te koorero, “He kai kei aku ringa”, araa, he kaupapa teenei e whakamana ana i te waahine, kia whakaawea hoki raatou ki te kawe i ngaa mahi karanga maa ngaa reanga whai muri mai.
