Nā Te Whakaruruhau kua tūhonohono, kua whakapūmauhia hoki ngā hononga whakapapa o ngā iwi o Te Tauihu e noho ana ki tōna anō rohe, ki Aotearoa whānui me te hunga e noho ana ki Waikawa hoki.
Ahi Mātao: Kāore te nuinga o ngā tāngata i tae mai ki te wānanga o Te Whakaruruhau i mōhio ki te reo me ngā tikanga, waihoki ki te marae o Waikawa. Koinei hoki tō rātou noho tuatahi ki tēnei rohe ātaahua. Ki ēnei tāngata, nā Te Whakaruruhau tō rātou hononga ki ō rātou whakapapa, ki te kāinga o Waikawa me ngā taonga tuku iho o te reo me ngā tikanga i whakarauora. Tūturu, he hurihanga nui tēnei ki ētahi, ā, koinei anō te tīmatanga o tō rātou ara reo. He tohu tērā o ngā hua nui o tēnei hui.
Ahikā: Ki ngā whānau e noho ana ki Waikawa, he hui nui a Te Whakaruruahau hei whakapakari ake i tō rātou mōhio ki te kawa, ki ngā tikanga me te reo, ā, kia whakatinanahia hoki ngā tikanga ki runga tonu i te marae. Kei te piki ake te manawanui o ngā whānau o te ahikā ki te whakahaere i ngā tikanga o te marae pērā i te karanga, i te whaikōrero me te karakia. Ko te whāinga roa, kia piki ake te nui o ngā whānau, i te mea ko rātou tonu te ahikā o te marae me te kāinga o Waikawa.
Hunga Mōhio ki te Reo: Koinei ngā mema o te whānau e pupuri ana ki te reo me ngā tikanga o Waikawa. Hei tauira ēnei tāngata mō te whakamahinga o te reo me ngā tikanga. He mea nui hoki tēnei ki ngā ākonga hou. Waihoki, e pūmau ana rātou ki te whakawhānui ake i tō rātou mōhiotanga ki te whakapapa me ngā hītori o Waikawa i a rātou e whakapiki ake ana i ō rātou ake pūkenga me ngā hononga ki waenga i a Waikawa me Te Ātiawa.
He ara rau tēnei e tae atu ai te kaupapa ki te tini o ngā whānau rerekē, e whakahāngai ana i ngā mahi kia tipu ake te māia me te raukaha o ia rōpū.
Kei te whakapakari tonu Te Whakaruruhau ki Waikawa i te Waikawatanga. E whāngai ana, e whakaawe ana tēnei kaupapa i ngā kaupapa hou e whakatō ana i te ao Māori me ngā taonga tuku iho ki ngā mahi o ia rā.
