Tuhono mai ki tēnei kaupapa, ko te reo te iho o ā mātou mahi katoa

Ko ngā mahi a Te Mātāwai e taunaki ana i te whakarauoratanga o te reo Māori, waihoki he whakakaha i ngā whānau ki te whakahoki i te reo Māori hei reo ūkaipō ki ngā kāinga me ngā hapori.

Mēnā e rata ana, e pārekareka ana koe ki ngā mahi whakarauora i te reo Māori, tukuna mai ō tātai pūmanawa ki [email protected].

Kei raro iho ngā tūranga wātea ki Te Mātāwai:

 

Ngā Tūranga Wātea

E pūmau ana a Te Mātāwai ki tōna hiahia ki te tū hei whare mahi pai, hei whare haumaru, hei wāhi hauora hoki mō ngā kaimahi katoa. Kei te mārama mātou me tiaki ō mātou kaimahi me ō rātou hauora. Kua whakatakotoria ēnei kōrero ki ngā kaupapa here e whakaatu ana i te hiranga o tō rātou hauora me tō rātou oranga. Waihoki, kei te whakapuakina anō ēnei kōrero ki roto i ngā huihuinga o ngā kaimahi, kei waenga hoki i ngā hoamahi me ngā kaiwhakahaere. Ko te Manaaki i te whānau, he manaaki i te kaimahi, he manaaki hoki i Te Mātāwai. Rite tonu tō mātou arotake i ngā kaupapa here e pā ana ki te tangata, kia tika ngā kōrero kei raro i te ture, kei raro anō hoki i Ngā Mātāpono o Te Mātāwai.

He mea nui te tangata ki Te Mātāwai, ā, kei te pūmau mātou ki ngā mātāpono o te ara whiwhi mahi tautika me te mana taurite o ngā kaimahi katoa, waihoki ko te hunga e whai ana i te tūranga mahi. Ahakoa te tūranga, ka kopoua e Te Mātāwai te tangata e whai ana I ngā tohu tōtika, ā, ka utua, ka whakangungua, ka whakawākia tōtika ngā kaimahi, ahakoa ko wai.

E pono ana a Te Mātāwai ki āna kaimahi, ā, e whai ana tā mātou kaupapa rapa tangata i ngā tukanga tōkeke kia whai māramatanga ngā tāngata katoa. E whai ana mātou i ngā kaimahi e mōhio ana ki te reo Māori, ki ngā tikanga me ngā momo pūkenga tōtika mō ngā mahi. Kei te mōhio a Te Mātāwai ki te nui o te uara me te whakamahinga o aua pūkenga ki waenga i ngā huihuinga o ngā kaimahi rātou ko ngā whānau reorua, ko ngā whānau reo Kotahi hoki i roto i ngā hapori me ngā momo huinga tāngata rerekē. He mea nui kia mahi ā mātou kaimahi i runga i te ngaiotanga me ngā tikanga tōtika, e rangona ai te wairua manaaki, kia rata, kia māia anō hoki ngā whānau ki te toro mai ki Te Mātāwai.

Kei te hiahia a Te Mātāwai ki te whakapoapoa, ki te whakapūmau hoki i te tangata tōtika ki āna tūranga. Nā, ka eke ngā utu mā ngā tūranga katoa ki te taumata ōrite o te rāngai whānui, ā, rite tonu te arotake o ngā utu.

He kaupapa here ā Te Mātāwai hei aukati, hei whakatikatika i te mahi whakawetiweti, i te mahi whakatumatuma me te mahi whakahāwea ki roto i te wāhi mahi hei whakaū i te noho haumaru me te taiao hauora ki te wāhi mahi.

E pūmau ana a Te Mātāwai ki tētahi wāhi mahi haumaru e hāpai ana i te wairua pai me te hauora nā te kaha o ō mātou kaiārahi, nā te pai o ngā hononga tāngata, me te whakatūnga o ngā kaupapa here me ngā tukanga whai take.