Ngā Paearu a ngā Kāhui

Te Pae Motuhake o Te Tai Tokerau:

• E tautoko ana i ngā kaupapa ka whakatū ki roto o te kāhui, waihoki rātou te hunga e noho ana ki te Kāhui o Te Tai Tokerau anake.
• E kore e tautoko i ngā utu haerenga a ngā Kaiako, ngā kaimahi me ngā kaiuru rānei e noho ana ki waho o te kāhui.
• Ko te rahi o te pūtea ka haumi ki te kaupapa kotahi anake, he $80,000.00.
   

Kaitono:

• Mehemea he kamupene, he pakihi rānei koe, e tika ana māu hoki ngā whakahaerenga o tō kaupapa.
• Mehemea e waihanga rauemi ana koe, me tuku Tono ā Pakihi (Business Case) waihoki me kore utu te tuku i ngā rauemi
   

Te Pae Motuhake o Tainui:

• Ka tautoko i ngā kaupapa ka whakahaere ki roto Te Kāhui o Tainui anake.
• Ka mātua ko te $50,000, heke iho rānei te rahi o te pūtea haumi ki ia kaupapa.

Kaitono:

• Me kotahi anake te tono mai i ia kaitono i te rauna haumi kotahi. 
  Me whakatakoto te mahere roa o te kaupapa mō ngā tau e toru. 
  Ki te kōwhiri koe i te Pou Tokomanawa, i te Pou Tuarongo rānei, me reo Māori te katoa o te tono.

Te Pae Motuhake o Mātaatua: 

• Ka tautoko i ngā kaupapa ka whakahaerehia ki roto o Te Kāhui o Mātaatua anake.
• Ka taea e ngā marae te tuku tono mai hei Pakihi. Heoi anō, mehemea e tono ana koe hei takitahi mō te Marae, me whai reta tautoko nō te Tarahati/Kōmiti o te Marae.
• E kore rawa e tuku haumitanga mō ngā kaupapa Kapa Haka. Heoi anō, mō ngā kaupapa ko te reo Māori te kauwaka mō te ako i ētahi waiata/mōteatea/mātauranga ki waenganui i ngā whānau, i te hapū rānei ka āta whakaarohia.

Kaitono:

• Me whakapapa ki ngā iwi o Te Kāhui o Mātaatua.
• Ki te tono koe kia whakahaere kura reo, me ahikā ngā kaiako o te iwi e whakahaere ana i te kura reo (hei tauira: he Ngāti Awa koe, e noho ana koe ki Whakatāne), ā, me whakapapa ngā kaiuru ki taua iwi. Ka mutu, me whai reta tautoko mai i ngā kaumātua/pakeke o taua iwi.
• Mō ngā tono katoa i raro i te kaupapa Piki Ake, me reo rua te tono.
• Mō ngā tono katoa i raro i ngā kaupapa Kake Ake, Kura Nui, Kura Roa rānei, me reo rangatira te katoa o te tono.

Te Pae Motuhake o Te Arawa:

• Ka mātua aro ngā haumitanga ki ngā kaupapa ka whakahaerehia ki roto o Te Kāhui o Te Arawa.
• Ka āta tiro pea ki ngā tono nō ngā uri e noho ana ki waho o te Kāhui mēnā he kaupapa e hapai ana i ngā uri o Te Arawa.
• Ko te rahi o te pūtea ka haumi ki te kaupapa kotahi anake, he $100,000.

Kaitono:

• Me tuhi i ngā pūtea tautoko katoa ki te mahere pūtea o te puka tono.
• Me whai mahere pakihi mō ngā tono e tono ana mō te $80,000 neke atu rānei.
• Me reo Māori ngā whakautu katoa o tō tono.
• Me tohu i ngā tāngata matua katoa, o rātou kawenga hoki. Ka mutu, he reta e tohu ana i tā rātou taunaki i ngā kawenga.
• Me whai reta tautoko nō te hapū, marae, iwi rānei e hāngai ana ki te kaupapa.
   

Te Pae Motuhake o Te Tai Rāwhiti:

• E tautoko ana i ngā kaupapa ka whakatū ki roto o te kāhui anake, waihoki nā te hunga e noho ana ki te Kāhui o Te Tai Rāwhiti.
• Ko te rahi o te pūtea ka haumi ki te kaupapa kotahi anake, he $80,000.
• Kāore mō te tuku haumitanga ki ngā kaupapa waihanga rauemi (atu i ngā utu mō ngā pukamahi a ngā kaupapa).
• Ka mātua tautoko i ngā kaupapa e aro pū ana ki ngā ahikā, ā, ka whakahaerehia e te ahikā.
   

Kaitono:

• Mō ngā tono katoa ka hāngai ki te Pou Kaiāwha, me whai, me hāngai rānei ki tētahi Rautaki Reo hoki
• Mō ngā tono katoa ka hāngai ki te Pou Tokomanawa, me whai Rautaki Reo, me hāngai rānei ki tētahi Rautaki ā-iwi hoki.
• Mō ngā tono katoa ka hāngai ki te Pou Tuarongo, me hāngai ki tētahi Rauta ā-iwi hoki
• Kia kotahi anake te tono, engari anō he tono atu anō mō te Kura Reo.
• Mō ngā tono katoa e tono ana mō te $60,000, neke atu rānei, me whai Hoa-Haumitanga mō tō kaupapa.
• Mō ngā tono katoa e ka kōwhiri i te Pou Tuarongo, me whakaatu mai i te pūtea tautokorua. Ko te pūtea tautokorua he pēnei i te koha, i te tāpaetanga ā-pūtea, aha atu rānei.

Te Pae Motuhake o Te Tai Hau-ā-uru:

• Ka tautoko i ngā kaupapa ka whakahaerehia ki roto o Te Kāhui o Te Tai Hau-ā-uru anake.
• Ka mātua aro ngā haumitanga ki ngā tono e hāngai ana ki ngā aronga haumitanga matua:
  -  Mārama Pū
  - Whāinga Roa
  - Tuku Ihotanga

Kaitono:

• Me whai mahere pakihi mō ngā tono $100,000, neke atu rānei.

Te Pae Motuhake o Te Tai Tonga:

• Ka tautoko i ngā kaupapa ka whakahaere ki roto o Te Kāhui o Te Tai Tonga anake.
• Ka tautoko i ngā utu haerenga mō ngā kaiako me ngā kaimahi matua e noho ana ki waho o te kāhui, engari kāore e whakaae ana ngā utu haerenga mō ngā whānau, ngā tauira rānei e noho ana ki waho o te kāhui.
• Kāore e haumi ana i ngā utu tauhoko, ngā rauemi/ratonga rānei e whakawhanake ana i ngā mahi kē o te pakihi.

Kaitono:

• Me whai mahere pakihi mō ngā tono e tono ana mō te $100,000, neke atu rānei.
• Me whai reta tautoko nō te hapū, marae, iwi, imi rānei mō tō kaupapa.

Te Pae Motuhake o Te Reo Tukutuku:

• Ka mātua tautoko i ngā kaupapa e hono ana ki tētahi rōpū tūroa.
• E tohutohu ana ki ngā kaitono kia kaua e tono ki kāhui kē atu mō te kaupapa ōrite.

Kaitono:

• Me whai mahere pakihi mō ngā tono e tono ana mō te $95,000, neke atu rānei.
• Me whai reta tautoko mai i ngā tāngata matua katoa o tō kaupapa.
• Me whai reta taunaki mai i te kaiwhakaputa matua mēnā e whakawhiti ana koe i te reo tuhi o tētahi rauemi kua whakaputa kē (e.g. te mana whakairo hinengaro me te mana whakaputa i ngā mahi).

Kua rārangihia ngā rōpū tūroa ki te whārangi Te Reo Tukutuku ki te Pae Tukutuku