Tā Mātou Rautaki me Tā Mātou Aronga Matua
Ahakoa te rerenga, me whai mātauranga te kaiurungi ki te whakatere i te waka, ki te kohi mōhiotanga kia āta mahere i te rerenga, waihoki ki te pānui i ngā momo tohu me te whakarite anō i te ara kia tae ki tōna ūnga.
Ko Te Mātātupu te tīma raraunga me te rangahau. Ko tā mātou mahi he whakarite i ngā raraunga, ngā mōhiotanga, me ngā mātauranga hei taunaki i te rere o te waka ki Hawaiki Mokopuna, ki te whakahoki i te reo Māori hei reo kōrero ki waenganui i a tātou whānau.
He kōunga ake ngā hua o ngā rangahau me ngā arotake mēnā kei ngā ringaringa o ngā kiripānga, arā ko ngā whānau, ngā mātua, ngā marae, ngā hapori, ngā hapū, ngā pou o ngā iwi me ngā Pou Reo/Kaiurungi Reo. Nā konei, ko te pāpāho, ko te whakatairanga me ngā whakamāherehere ngā putanga nui ka haere tahi me ngā rīpoata rangahau me ngā wheako whaitake.
Kua waihanga e Te Mātātupu i tētahi puna mātauranga me ngā raraunga hei taunaki i ngā whakaritenga puta noa i Te Mātāwai tae rawa atu ki te rāngai tumatanui mō te whakarauora i te reo Māori. He kawenga nui hoki tā rātou ki te tuku pūrongo mō te whakatutuki i ngā putanga e hāngai ana ki te rautaki Maihi Māori.
E aro ana a mātou rangahau ki ngā momo mahi whakarauora reo kei te kōeke whāiti, ki waenganui i ngā kāinga, ngā hapori me ngā iwi. Ko ngā mahi kei te kōeke whāiti e aro pū ana ki ngā whānau me ngā hapori, ā, engari ko ngā mahi kei te kōeke whārahi kei te rāngai tumatanui, ki te ohanga whānui o te motu. Ko te whakarauora o te reo Māori ki te kōeke whārahi te aronga matua o te rautaki Maihi Karauna, ā ka whakahaere e te Karauna.
Ngā kawenga matua o te tīma
- Ka waihanga e mātou ngā momo rangahau kia huraina mai he momo Mātauranga Māori hou.
Ngā raraunga o ngā Kaupapa whakarauora reo o Te Mātāwai
- Ka kohikohi e mātou ngā momo raraunga e hāngai ana ki ngā kaupapa whakarauora reo o Te Mātāwai, pēnei i ngā wānanga, ngā kura reo, ngā karaehe reo me ngā taiopenga tumatanui.
- E whakaatu ana ā mātou rangahau te taunaki mai o ngā kaupapa whakarauora reo i te Oranga o te reo, he mea ārahi e ngā putanga matua, arā, te Tukuihotanga me te Hononga Hapori Reo.
- Tukuihotanga
- Hononga Hapori Reo
- He Oranga te reo, he oranga te whānau
Te Mahitahi me te arataki ki ngā mahi rangahau me ngā raraunga
- He pou arataki mō ngā raraunga reo Māori, tae rā anō ki te mahi tahi ki ērā atu rōpū Reo Māori mō ngā rangahau.
- He tautoko hoki tō tātou Poari, ngā Pae Motuhake, ngā Kāhui hoki ki ngā mōhiotanga me ngā hua e hāngai ana ki ngā kaupapa whakarauora reo, ngā raraunga me ngā rangahau hoki.
