Kua riro mā Te Mātāwai te haepapa nui ki te ārahi i te rautaki Maihi Māori, te rautaki reo mō te iwi me te Māori, me te noho hei kaitohutohu i te te rautaki Maihi Karauna, te rautaki reo a te Karauna. Ko te karauna ngā kaiārahi i te Maihi Karauna.
Hei te tau 2040, ko tā mātou e manako nei:
- a) Kia kotahi miriona tāngata, neke atu rānei, te nui e whakamahi ana i te reo Māori ki roto i ngā wāhi rumaki ki ngā hapori.
- b) Ka noho ko te reo Māori hei reo matua mō ngā tamariki, 25 ōrau te nui, i ngā tamariki Māori katoa (kāore e neke atu i te whitu tau).
Ā Mātou Mahi
- Ka mahi tahi me te Karauna kia whakarauora i te reo Māori.
- Ka whakakanohi i ngā iwi me ngāi Māori, mā te tauira motuhake o te Poari me ā mātou Pae Motuhake, ka noho nei hei Kaitiaki o te reo Māori.
- Ka whakamana i ngā iwi me ngāi Māori kia ārahi i te whakarauora reo Māori i roto i ngā kāinga me ngā hapori.
- Ka tuku mōhiohio, ka whakangao hoki ki ngā whānau, ngā hapori, me ngā iwi kia whakahoki i te reo Māori hei reo ūkaipō mō te kāinga.
Tā Mātou Pānga
Ngā kāinga, ngā hapori me ngā iwi
Kei te iho o ā mātou mahi katoa ngā kāinga, ngā hapori me ngā iwi nā te mea e whakarauoratia ana te reo ki aua wāhi rā. Nā reira, e whakapau kaha ana mātou ki te tautoko me te whakarite tikanga ka whakaāhei i ō mātou whānau, hapori hoki kia ārahi i ō rātou ake ara reo, kia whakawhānui i ō rātou hononga hapori reo, i te mahi tahi hoki mō ngā rongoā tika mā ō rātou whānau, hapori hoki.
Te Rīpoata a Te Rōpū Tohutohu Motuhake
I te tau 2025 i tukuna e Te Rōpū Tohutohu Motuhake ngā kupu āwhina ki ngā hinonga reo Māori, i runga anō i ngā wawata o ngā Hoa-Toihau o Te Mātāwai me te Minita Whanaketanga Māori. He mea whakatenatena i tētahi rautaki reo e arotahi ai, e whakakotahi ai i ngā whakataunga mō te reo Māori me te whakapai anō hoki i ngā pūtea a te Karauna. Pānuitia te rīpoata nā Te Rōpū Tohutohu Motuhake i te pae tukutuku o Te Puni Kōkiri.
