Ngā kōrero matua me mōhio e koe mō te whiwhi pūtea

Kua āta whakaritea e Te Mātāwai ngā whāinga me ngā mātāpono hei whai ki te whakatau i ngā tono ka whakawhiwhia ki te pūtea. E hangai ana ēnei mahere ki te aronga matua me ngā whakaarotau o ngā Mahere Haumi a ngā kāhui, waihoki ngā kupu awhina a ngā Pae Motuhake.

Ki te whiwhi pūtea koe nō Te Mātāwai, me tutuki i a koe ngā kawenga o te kirimana. Pēnei i ngā rīpoata tūāoma, me te hapai hoki i te tūruapō o Te Mātāwai me ngā whāinga matua e rua e hangai ana ki ngā kāinga me ngā hapori, me te whakahaere tūraru anō hoki, ka mutu he tautoko mā te kōrero me te pāpāho i ngā kaupapa.

Arā anō ngā pitopito kōrero mō ngā kawatau ki te tutuki tō tono, e hua mai ana ki raro nei.

Ko tā te tūāoma Rīpoata Kauneke he āta whakahua mai e pēhea ana te haere o te kaupapa.

Ko tā te tūāoma Rīpoata Whakamutunga he whakaatu mai i ngā putanga o te kaupapa.

Tērā pea ka tono i a koe kia uru ki ngā mahi arotake a Te Mātāwai.

Me mātua whakaputa pikitia papai mō te kaupapa ki te tari o Te Mātāwai mō a rātou kawenga pāpāho pēnei i te Ripoata ā Tau, te pae papāho papori ranei.

* Ka panonihia ēnei herenga i ōna wā.

He īnoi ki a koe ki te whakatairanga i a Te Mātāwai hei kaitaunaki i te kaupapa, waihoki te hapai ake i te Maihi Māori. Ka tāea e koe ēnei kupu te whakamahi ‘He mea tautoko nā Te Mātāwai - Kia ūkaipō anō te reo’. Ka mutu, ka āpiti atu i te tohu tika o Te Mātāwai e hangai ana ki te aratohu tūtohu o Te Mātāwai.

E tino ngakau nui ana mātou ki ngā kaupapa kua whakamahi i ngā tūtohu o Te Mātāwai ki o rātou rauemi whakatairanga me te tūhono i a rātou pae pāpāho papori i mua, i waenganui, a muri rānei i te kaupapa ki ngā pae pāpāho papori a Te Mātāwai.

Tuku karere atu ki a Te Mataihi - Te Tīma Pāpāho o Te Mātāwai, mehemea e hia awhina ana koe.

Ko tā Te Mātāuru, he whakahaere i te anga haumi o Te Mātāwai, he whakapakari ake hoki i te āhei me te raukaha o te tauira whakahaere o ngā hapori. E hāpai ana ēnei āhuatanga i te whakarauoratanga o te reo Māori i roto i ngā kāinga me ngā hapori, i raro anō i ō mātou aronga tōmua, arā, ko te Tukuihotanga me te Hononga Hapori Reo. 

Ka kaha tonu a Te Mātāuru ki te whakamana i ngā Pae Motuhake, i ngā Pou Reo me ō rātou Kāhui ki te tautoko i te whakapikinga ake o te māia, o te mōhio me te nui o ngā whānau e kōrero Māori ana i roto i ō rātou kāinga, i waenga i ngā hapori me ngā iwi i ia rā. 

Ka ea tēnei whāinga mā te whakaputanga atu o ngā pārongo tōtika, i te wā tika, mā te huhua o ngā whakapāpātanga atu, mā te whakatūnga me te whakapūmautanga o te whanaungatanga, mā ngā whakataunga tōmua, mā te āta māherehere, te tuku pūrongo me ngā mahi aroturuki.

I te wā o te Rauna Haumitanga a Te Mātāwai, he hiahia nō te Tīma Pāpāho ki te tono ki a koe mō ētahi whakaahua, ētahi kiriata, kōnae ipurangi rānei o tō kaupapa mō te Rīpoata a Tau, te pae pāpāho papori me te rīpoata kauneke mō ngā haumitanga ki te Minita Whakawhanake Māori, te tuari rānei i ngā mōhiohio ki ngā hoa pakihi anō hoki.

Mēnā ka tāea e koe te hopu i ngā pikitia arinui me ngā pikitia kounga o ngā wāhanga katoa o te kaupapa e ngawari ake hei te wā ka tono ai te Tīma Pāpāho ki a koe. Ko te wawata kia 1MB kia 3MB rānei te rahi o ngā pikitia, ā kia jpeg the hōputu āno hoki.

Ka tāea hoki e koe te āpiti i ngā whakaahua ki tō Rīpoata Kauneke, me te Rīpoata Whakamutunga hoki. Kia kapo rau tātou!

I whakaturia i raro i Te Ture mō Te Reo Māori (2016) (The Māori Language Act 2016), hei tari motuhake i raro i te ture hei kawe i ngā wawata o ngā iwi me ngai Māori. Ko ngā kawenga o Te Mātāwai e pēnei ana:

  • te whakawhanaketanga o te rautaki mō te whakarauora i te reo Māori (the Maihi Māori), waihoki

  • te haumi i ngā kaupapa whakarauora reo a ngā hapori, te whanake me te whakatairanga i te reo Māori mā te Maihi Māori anō hoki.

Mā te haumi i ngā kaupapa ā ngā hapori, e rapa ana a Te Mātāwai i ngā putanga hirahira e hangai ana ki Te Whāinga Tāhuhu (Vision), Ngā Whāinga Heke (Outcomes), me Ngā Whāinga Rongomaioro (Audacious Goals) o te Maihi Māori.

Ka hapai hoki tō kaupapa i te Maihi Māori.