He ahurei ā-hapori ki Rotorua, he hīkoi rangatū, he taiopenga anō hoki mō Te Wiki ki Kaikohe, ki Tūranga-nui-a-Kiwa, ki Whanganui, ki Te Whanganui-a-Tara me Ōtautahi – e piki haere ana ngā mahi whakamahere mō Te Wiki o te Reo Māori huri noa i Aotearoa!
E whakahīhī ana a Te Taura Whiri i te Reo Māori me Te Mātāwai ki te pānui atu i te whakarewanga o te tūāoma hou o Te Wiki i reomāori.co.nz. E rite ana tētahi mahere pāhekoheko, ngā waitohu ā-takiwā, me ngā tahua mō ngā kōkiritanga ā-rohe mō Te Wiki o te Reo Māori, 14-20 o Mahuru 2026.
Mahere pāhekoheko
Mā te mahere pāhekoheko hou i reomaori.co.nz e pai ai tō tuku atu i ngā taiopenga e whakaritea ana i tō tāone e nui ake ai te whai wāhi a tō hapori ki ngā whakanuitanga hei te Mahuru e tū mai nei. Kei te kimi whakaawenga? Tirohia tō tāone mō ngā mahi kua whakaterea.
E ākina ana ngā kura, ngā wāhi mahi, ngā rōpū ā-hapori, ngā karapu hākinakina me ngā pakihi ki te rēhita i ā rātou anō taiopenga me te whai wāhi ki te whakanui a te motu.
Tō tāone, tō ara
I tēnei tau, ka taea hoki e ngā hapori tā rātou tautoko te whakaatu mā te tiki ake i tētahi waitohu motuhake o 'Tāone Reo Māori' e whakaatu ana i te ingoa o tō rātou tāone. E wātea ana ngā waitohu i reomaori.co.nz. He ara ngāwari tēnei e whakaatu ai ngā whānau, ngā kura, ngā marae, ngā whakahaere, ngā pakihi me ngā rōpū ā-hapori i tō rātou hononga ā-takiwā ki Te Wiki, me te whakanui i te reo Māori.
Kia auaha! Whakamahia te waitohu motuhake o tō tāone ki te whakarite i ngā rawa pēnei i ngā huri, ngā tīhāte, ngā pānui whakaahua, ngā haki rānei - arā noa atu ngā kōwhiringa! Engari kia mahara ake ko te tuku tautoko te aronga, kaua ko te whai pūtea.
Ngā kaiwhiwhi o te Tahua Whakahohe
Hei āwhina i te whakaputanga o te kaupapa o te tau nei, o 'Tāone Reo Māori' kua whiwhi tautoko ngā rōpū ā-hapori me ngā whakahaere huhua i ngā takiwā mā roto mai i te Tahua Whakahohe i a Tāone Reo Māori. Mā konei e whai tautoko anō ai rātou ki te whakanui i te reo i ō rātou tāone, mā ō rātou anō ara.
"Ka piki te kaha o te reo Māori ka kitea ana ia, ka rangona ana ia, ka kōrerotia ana ia i ō tātou ao i ia rā", tā Ngahiwi Apanui-Barr, Tumu Whakahaere o Te Taura Whiri.
"Mā te Tahua, e tautoko ana mātou i ngā hapori ki te whakatinana i ō rātou whakaaro me te whakarite i ngā whaitua e tūhono ai ngā tāngata ki te reo Māori i te taumata takiwā."
"Ahakoa koe kei Kaitāia, kei Motupōhue, kei waenganui rānei, ko Te Wiki o te Reo Māori tētahi ara e whākahangia ai tō tātou reo rerehua mā te tāera motuhake o tō Tāone Reo Māori", tā te Hoa-Toihau o Te Mātāwai, tā Mātai Smith.
"Mai i ngā tātāwhāinga kī-o-rahi ki ngā ahurei kapa haka, ki ngā karaehe kori tinana i te reo Māori, e hiamo ana mātou ki te kite i te whakakaotanga o ngā hapori puta noa i Aotearoa ki te whakaatu i tō rātou aroha me tō rātou takohanga ki tō tātou reo Taketake."
Tirohia ngā kaitono waimarie katoa.
Whakapiripiri mai mā runga ipurangi
Mō te hunga kāore nei e āhei te tae ā-tinana mai ki ngā taiopenga, kua hoki mai anō te terenga kauhaurangi wā tina mō Te Wiki i 2026.
I roto i ngā rangi e whā, ka rongo i ngā manuhiri whakaaweawe e āwhina ana ki te whāmāori, ki te whākaha anō hoki i te reo Māori i ia rā. Mai i ngā hapori hākinakina tiputata me ngā mahi whakarauora reo tuku iho, ki ngā mahi ārahi pakihi me ngā kōrero pūrākau i te mata nui, mata iti anō hoki, ka tūhura ēnei matapakinga i ngā ara huhua e takoha ai ngā hapori ki tētahi anamata tōnui mō te reo Māori.
"Ko tā Te Wiki o te Reo Māori he whai kia kaingākautia te reo Māori i ia hapori. Ahakoa koe ka uru ki tētahi hīkoi rangatū i te tāone, ka tae ake rānei ki tētahi taiopenga ā-takiwā, ka tiki ake i te waitohu o tō tāone, ka takiuru rānei ki tētahi kauhaurangi, arā tētahi ara mō te katoa ki te whakaatu i tō rātou aroha ki te reo nā te mea mō te katoa te reo Māori", tā Ngahiwi.
Kimihia he taiopenga, rēhitangia āu ake ngohe, tīkina ake rānei te waitohu o tō tāone, ā, tūhuratia te hōtaka kauhaurangi mā te peka atu ki reomaori.co.nz.
