Mai i ngā tāone iti ki ngā tāone nunui, e pōhiritia ana ngā hapori puta noa i Aotearoa kia huri i ō rātou tiriti, ō rātou wāhi mahi me ō rātou wāhi tūmatanui hei Tāone Reo Māori i Te Wiki o te Reo Māori i tēnei tau.
Ka tū Te Wiki ā te 14-20 o Mahuru 2026.
E arahina ana e Te Taura Whiri i te Reo Māori me Te Mātāwai, ko tā Tāone Reo Māori he akiaki i ngā tāone rikiriki me ngā tāone nunui o ngā momo rahinga katoa ki te mairanga i te reo Māori i ngā wāhi e noho nei, e mahi nei, e tūhono nei hoki tātou i ia rā.
Ahakoa ka mau tonu te tāhuhu o Ake, Ake, Ake - Mō Ake Tonu Te Reo, ko tā te aronga o 2026 he tō i te titiro ki ngā hapori kei ngā rohe i tā rātou noho hei kaiāki matua o te whakarauora reo.
"Ko tā Tāone Reo Māori he whai kia kitea, kia rangona, kia whakamahia anō hoki te reo Māori i ngā horopaki o ia rā," tā Ngahiwi Apanui-Barr, te Tumu Whakahaere o Te Taura Whiri.
"E pōhiri ana mātou i ia tāone i Aotearoa kia whai wāhi mai mā tētahi ara e whakaata ana i a rātou anō - mā roto mai i ngā hui, ngā tohu, ngā mahi o ia rā, mā te tīmata noa rānei i ngā matapakinga."
E whakamihi ana te aronga o tēnei tau i ngā hapori kua roa nei e manaaki ana i te reo Māori i ngā mahi o ia rā, me te whakaawe, me te akiaki hoki i ētahi atu ki te tāwhai i te tūāoma tuatahi. He wāhi tō te katoa i te āpōpō o te reo Māori.
He ngāwari noa te whai wāhi ki a Tāone Reo Māori, arā, ngā pakihi e whakairi ana i ngā tohu reorua, ngā wāhi mahi e whai wāhi ana ki ngā waiata, me ngā hapori e manaaki hui ana i taua wiki anō. Ahakoa pēhea, ko te āki ki ngā hapori e pīrangi ana kia Tāone Reo Māori rātou, kia tīmata ngā whakamahere ināianei.
E whakawhanake ana ngā pokapū nunui, tae atu ki a Pōneke, Rotorua me Ōtautahi, i ngā taiopenga me ngā hui whakarewa mō Rāhina 14 o Mahuru, ā, e ākina ana hoki ngā tāone iti ki te manaaki i ngā whakanuitanga me ngā whakaaturanga o te aroha o te hapori ki te reo Māori.
"Ko ō tātou hapori te manawa pātukituki o te whakarauora reo. E manawareka ana mātou ki te whakanui i te reo Māori nōna ka ora, ka ngaruru hoki puta noa i ngā wāhi o ia rā o Aotearoa mō Te Wiki, ā, ā tua atu," tā te Heamana-Takirua o Te Mātāwai, tā Mātai Smith.
"Ahakoa tō tāone kei te taumanu i te reo, kei te whakatipu i te reo, kua roa nei rānei e kawe ana i te reo i roto i ngā whakatipuranga, he takoha tā ia hapori kia ora mō ake tonu te reo."
Kia mau tonu mai mō ētahi pānui anō me ētahi whakaaro e Tāone Reo Māori ai tō tāone! Peka atu ki: reomaori.co.nz
