E pōwhiri ana a Rotorua ki te hapori whānui me ngā manuhiri kia tukua te reo Māori kia rere mō Te Wiki o te Reo Maori, mai i te 14 ki te 20 o Hepetema 2026, ka mutu mō ngā rā kei tua.
Nā Te Taura Whiri i te Reo Māori (te kōmihana mō te reo Māori) me Te Mātāwai i kōkiri i tēnei kaupapa, a Te Reo Towns i ngā tāone ki te whakatairanga i te reo Māori ki ngā kāinga, ngā wāhi mahi, me ngā tūwahi e huihui ai ngā tāngata i ia rā, i ia rā.
Hei tā te Hoa-Toihau o Te Mātāwai me te Poutaki o Te Pae Motuhake o Te Arawa Waka a Ruakiri Fairhall, e whakahī ana a Rotorua ki tō rātou Tāone Reo Māori, waihoki i whakanuia tō rātau tāone hei tāone reo rua a koia te tuatahi o Aotearoa. I whakaarahia hai tāone reo rua.
“Ka Pūhaorangi te reo Māori ki te kōrerotia te reo ki nga kāinga, ngā wāhi mahi, ngā kura me ngā hapori. E hiahia ana mātau o Te Arawa Waka kia whānui ake te rongo o te reo Māori i ngā taringa me ngā ngākau, kia kitea, engari ko te aupiki nui katoa ko te kōrero tonu me te whakamahi tonu o te reo Māori hei ngā rā kei tua rā o te mutunga o tēnei wiki.
“Mā roto mai i ngā momo tūmahi o ia rā, o ia rā, e tautoko ana mātou ki te waihanga i te anamata, e heke ai he reo ora, he reo taurikura hoki ki ngā tamariki, ki ngā mokopuna, ki te hapori whānui. Kia Pūhaorangi anō te reo,” te kōrero a Ruakiri.
He Kawhe Kōrero ia ata, ia ata, hei tūmahi reo Māori tuatahi mai i te 7 ki te 8:30 i te ata ki Rumaki Café. Ka $2 te utu ki te hoko kawhe, hei reira ako ai i ngā kīanga reo Māori, ka tākaro kēmū, ā ka rumakina e te taiao kōrero reo Māori. He kai hoki hei hoko mō te hunga e pīrangi ana ki te noho atu me te kōrero tonu.
Hīkoia ngā hītori o Rotorua ki Kōrero Hītori, he terenga kaihautū ka tū i ētahi ata o te wiki nei. Ki Te Koura Māwhitiwhiti hai te Mane mai i te 10 ki te 11, ki Ōhinemutu hai te Wenerei mai i te 9 ki te 10, a ki Te Whakarewarewa hai te Paraire mai i te 9 ki te 10. Ka rongo ngā kaiuru i ngā kōrero o te hāpori, ka ako hoki me pēhea te whakahua tika i ngā ingoa, waihoki te hiranga ahurea o ēnei tūwāhi motuhake.
Korikori tō tinana, ka whakamātau ai i tō reo ki te Kaupapa Whakapakari, ka tū ki Village Green mai i te 12-1 i te ahiahi hai te Tūrei me te Tāite. He hanumitanga tēnei o te kori ā-tinana me te kori ā-reo hoki, mā te ranu i ngā tohutohu korikori i te reo Māori me ngā kupu e hāngai ana ki te hauora, ngā nekehanga me te oranga hoki. Mā Te Papatākaro o Te Arawa ēnei tūmahi whakapakari e whakahaere.
Ka tūhera ki ngā whānau me ngā manuhiri, ahakoa te pakeke, ki te haere ki The Arts Village mai i te 10:30 karaka ki te 11:30 karaka i te ata o te Tūrei ki te Paraire, ki reira kite ai i ngā momo tūmahi pai mō te whānau pēnei i te kēmū Tākaro, te tītī tōrea, te tī rākau, aha atu, aha atu. E wātea ana ki te katoa, ko ēnei momo terenga tūmahi he huarahi e rongo ai i te wairua ngahau me te tūhono ki te reo Māori mā roto i te tākaro me te wānanga.
Ka haere tonu ngā kaupapa whakanui hai te ahiahi o te Tāite i Te Pō Mākete ki te pokapū o te tāone o Rotorua. Mai i te 5 karaka i te pō, takatū ai nga kaiwaiata me ngā korokoro tuī o te hapori ki te atamira ki te whakanui i ngā Toi Whakaari Māori, Tāonga Pūoro, me te reo. Piri atu ki te kai (kore utu) nō te tīmā o Rumaki i a koutou ka toro atu ki ngā mahi ngahau.
Ki te kite i te mapi tūmahi, ki te tikiake i ngā tohu me te pānui i ngā taipitopito katoa mō te kaupapa, tirohia ki www.reomaori.co.nz/rotorua.
Nā The Arts Village Rotorua te whakaahua.
