E whakahī ana a Te Mātāwai i te piki tūranga Hoa-Toihau hou a Ruakiri Fairhall (Ngāti Tarāwhai, Te Arawa, Te Whakatōhea).
Hei tā te Hoa-Toihau onāianei, a Mātai Smith, ka tō mai a Ruakiri i ōna pūkenga mana urungi, whakarauora i te reo Māori, haka, ārahi i te iwi anō hoki. Ka mutu, e whakamomori ana ia ki te whakatairanga i ngā wawata reo o ngā whānau, ngā hapū me ngā iwi.
“E ngākaunui ana a Ruakiri ki te reo Māori, ā, he maha ngā kaupapa reo kua tautokona e ia i Te Arawa me te ao whānui, inarā, ngā kaupapa reo i Rānana.”
“He nui ngā taonga kua takoha mai e ia mai i tōna ekenga hei mema o te Poari, ā, e harikoa ana mātou kia pōhiri i a ia ki tēnei tūranga hou” te kī mai a Mātai Smith, Hoa-Toihau o Te Mātāwai.
I piki a Ruakiri ki te Poari Matua o Te Mātāwai i te marama o Mei 2025, nōna e whakakapi ana i tērā tūranga mai i te marama o Oketopa 2024. Kua noho ia hei māngai mō Te Pae Motuhake o Te Arawa nō te tau 2021.
Ko ngā pūkenga mana urungi e tōia nei e ia, he mea take mai i ana mahi taratī mā Ngāti Tarāwhai Iwi Trust, mā Te Reo Irirangi o Te Arawa, mā Ngā Kohinga Whakairo o Hinemihi Charitable Trust anō hoki.
"E noho whakaiti ana ahau i runga i te kopounga ōku e te Poari hai Hoa-Toihau mō Te Mātāwai. Ka whāia e au āku mahi i runga i te pono, i te ngākau tapatahi kia tutuki ai te kaupapa i whakaritea mai ai hai pupuru, hai kawe hoki mā mātou o Te Mātāwai mō te reo Māori, kia ora tonu ai mō ngā tamariki mokopuna o āpōpō puta noa i Aotearoa me te ao whānui," te maioha a Ruakiri.
Te Hoa-Toihau o Te Poari o Te Mātāwai, Ruakiri Fairhall (Ngāti Tarāwhai, Te Arawa, Te Whakatōhea) i kopoua ki tēnei tūranga hautū ōna inanahi.
