RaRau Mai

He akoranga toi reo Māori tēnei mā ngā whānau. I hua mai tēnei hōtaka o ngā whānau o Te Papaioea ki tētahi whaitua rumaki i te reo Māori. He wairua harikoa tō tēnei hōtaka, he ātaahua hoki ngā mahi. He mea whakatū nā Tania Te Tau, he kaiako nō te kōhanga reo rāua ko Karangawai Marsh, he kaiwhakaako reo Māori mā ngā pakeke, he ringatoi anō. He kaupapa tēnei mā ngā tamariki me ō rātou whānau e ngākaunui ana ki te kōrero i te reo i te kāinga hei reo tuatahi, ā, kei te hiahia hoki rātou ki te whakapakari ake i tō rātou reo mā te mahi toi. Kei te tautoko hoki tēnei rōpū i te hunga e ako ana i te reo hei reo tuarua.