Toitū Te Reo: he hui whakaihiihi, he hui whakanui i te reo Māori ki te katoa

I tērā marama, i noho mai ngā ara matua i te pokapū o Heretaunga hei wāhi ūnga mō te reo Māori. I tae atu te 8,000 tāngata puta noa i te motu,Māori atu, iwi kē atu, ki te whakanui i te taiopenga reo Māori tuatahi o te ao e kīia nei, ko Toitū te Reo.

Ko te ihomatua o Toitū te Reo, he kaupapa whakahaumanu, he kaupapa whakatairanga hoki i te reo Māori. I rauhī katoa atu te tini o ngā toa tauā me ngā mātanga o te reo ki te tuku i ō rātou mōhiotanga ki ngā mahi whakarauora reo; ko Hana O'Regan, ko Tā Tīmoti Kāretu, ko Tā Hirini Moko Mead, ko Tā Pou Temara, ā, tae noa ki Te Ariki Kuini Nga wai hono i te po Pootatau Te Wherowhero VIII.

I mahi ngātahi a Kauwaka, a Ngāti Kahungunu Iwi Incorporated me te Kaunihera ā-Rohe o Heretaunga ki te whakahaere i tēnei hui, ka mutu, he mea whakaaweawe e te Welsh Eisteddfod Festival, he huihuinga e whai wāhi ai te hunga ako me te hunga matatau ki te noho tahi, ki te kōrero tahi.

Nōna e kauhau ana i Komiti Kaha, te hui ā-tau a Te Mātāwai, i tērā atu wiki, i kōrero te Kaiwhakahaere Matua o Kauwaka, a Jeremy Tātere Macleod, mō tētahi o ngā hua i Toitū Te Reo, “Ko tētahi hua nui ki a au, ko ngā mea iti noa iho nei te reo, e tino mataku ana ki te kuhu mai i roto i tō tātou ao; kua whai wāhi rātou. He wāhi haumaru.”

He mea tautoko a Toitū Te Reo e Te Mātāwai i te rauna haumitanga 2024/2025.