Te Hokinga ki Taiwana ki te tuku i ngā tirohanga reo

I puea ake te hōnore nui ki Te Mātāwai, mōna i hoki ki Taiwana ki te tuku kauhau ki te Austronesian Languages Forum ki te whakatakoto i ētahi kōrero e pā ana ki te whakarauoratanga o te reo Māori.

I rauhī katoa mai ngā kairangahau me ngā āpiha o Ngā Moutere o Marshall, o Kānata, o Aotearoa, o Te Moana nui a Kiwa me Taiwana ki te wānanga i ētahi tirohanga, mātauranga hoki.

E mea ana te kaitohutohu matua o Te Mātāwai, a Ria Tomoana, ahakoa kua tino taunga a Aotearoa ki ngā mahi whakarauora reo, arā noa atu te nui o ngā kaupapa hei ako mai mā Taiwana ki a mātou; e 42 ōna momo reo rerekē, ā, 17 ōna iwi.

“He aroha, he manawanui hoki tō ngā iwi taketake puta noa i te motu ka titi kau ki ō tātou ngākau,” te kōrero a Ria.

I pōhiritia anō a Teina Boasa-Dean (he mema nō Te Poari Matua o Te Mātāwai), a Ria Tomoana, te kaitohutohu matua mō Te Mātāwai me te kaiwhakahaere haumitanga mō Te Mātāwai, a Nate Brabender ki te taiopenga ki te tuku kauhau e pā ana ki te kaupapa, ‘Policies and measures for creating a language friendly environment’.

Ko ētahi o ngā mahi miramira i reira, ko te haere ki te tuku mātauranga ki te Indigenous Language Research Foundation, ko te haere ki te reo irirangi me te taiwhanga whakaata ki te hopu i tētahi pao, ko te tūnga hoki o tētahi hui whakapūmau i tētahi tauākī whakaaetanga me Taiwana kia kāpuia ngā tūhononga i waenganui i ngā iwi e rua.

“Mīharo ake nei tō mātou hokinga ki reira ki te kite anō i te hunga i tūtaki ai mātou i mua. Nā te kaha o ngā tūhononga kei waenganui i a mātou, kua kore noa iho e tino pāmamao te tawhiti o tētahi i tētahi atu,” te kī mai a Ria.