Kua mūrau te tini e hoka ai ngā painga kura reo ki taumata kē
Pānui Pāpāho
E tino hau ana te rongo mō ngā painga e puta ake ana i ngā kura reo i huarua ai te nui o te tautoko a Te Mātāwai i ngā kaupapa ako i te reo Māori mō te tau 2023/24 i te tau tahua ka mahue nei.
Ko Te Mātāwai kei te ārahi i ngā mahi whakarauora i te reo i ngā hapori. I tēnei tau tahua 2023/2024, ko tōna 61 ngā kura reo kua tautokotia huri noa i Aotearoa nei, ā, e 29 ngā kura reo i tū i te tau 2022/23. I mua atu i tērā, e rima noa ngā kura reo matua.
Kua tū e whā ngā kura reo i tēnei marama: ko Te Kura Reo o Waimārama ki Te Matau a Māui, ko Kura Reo Kāi Tahu ki Te Waipounamu, ko Te Kura Reo Ki Ngāti Awa ki Whakatāne, ā, ko Te Taumata ki Te Hiku o te Ika ki Muriwhenua. E whanga mai ana ētāhi atu hei ngā marama tata e tū mai nei.
Kotahi rau te toharite o te huhua tāngata ka tae ki ia kura reo, nā reira, e hia mano tāngata te nui e whakapakari ake ana, e karawhiu ana, e tae mai ana rānei ki te whakamātau anō i ō rātou ake reo i tētahi wāhi rumaki.
“I ēnei rā, uaua ake nei te whakapūmau i tētahi tūranga i ngā kura reo [katoa]; he ōrite tōna uaua ki te hoko tīkiti konehete – ka tere pau katoa. Ka nui te whakamīharo ki te tokomaha o te hunga e hiahia nei ki te whakapakari i a rātou anō i ngā huihuinga kura reo nei, me te aha, ka kaha ngana ngā Pae Motuhake ki te tautoko i ngā tono kei ā rātou ake rohe ia tau.”
“Heoi anō, i wero nui ai tēnei nā te iti o te pikinga o ā mātou pūtea mai anō i te tīmatanga, nā reira, ko tōna 75% te nui o ngā kaupapa kāore i te tautokotia. Kei te whai tonu Te Mātāwai i ētahi atu huarahi hei whakapiki i tēnei pūtea haumitanga, inā hoki, arā ke atu pea te āhua o ngā hua ka puta ake i tua atu i te pūtea.”
E mea ana a Poia, nā te tokomaha o te hunga e taetae atu ana ki ngā kura reo, kua riro kē mā ngā toa kōkiri i te reo Māori te haepapa nui e kawe ki te whakatū anō i ētahi atu huihuinga kura reo.
Hei tā te Tumu Whakarae a Te Mātāwai, a Poia Rewi, ahakoa ngā hiahia a te kāwanatanga ki te tāmi i te kōrerotia o te reo i ngā ratonga tūmatanui, kei te kaha ake te hiakai mai a ngā hapori Māori ki ngā mahi rumaki reo. Me te mea nei he porotēhi, ko te āhua nei e titikaha ake ana a ngāi Māori me ngāi Tauiwi ki te whakamahi i te reo.
Ko te kōrero a Poia, “nui ana te mihi ki ngā kaha puta i te motu e whakamomori nei, e manawa kaha nei ki te hiki i ngā kaupapa reo katoa nei. Ka wani kē!”
Ētahi atu Pārongo
- He hinonga motuhake a Te Mātāwai e mahi kōtui ana me te Karauna ki te kōkiri i ngā mahi whakarauora i te reo Māori mō ngā iwi e tautiaki nei i te reo. He mea whakapūmau Te Mātāwai e Te Ture mō te Reo Māori 2016.
