Kua Whakaputaina te pātuitanga ā-motu hou mō He Tohu Huarahi Māori
Pānui Pāpāho
Kua whakaae tahi a Te Mātāwai me Waka Kotahi kia hanga whakatau ngātahi mō ngā tohu ikiiki reorua e whai ake ka heria kia kōrerorero tahitia e te iwi whānui hei te tōmuritanga o te tau 2022 nei.
Ka tautokona te Rōpū He Tohu Huarahi Māori e tētahi rōpū pūkenga maha mai i ngā whakahaere e rua me tētahi rōpū mātanga kaiwhakamāori reo Māori nō te motu whānui. Ko Te Mātāwai te mana i ahu mai i ngā Iwi me te Māori, ā, ko rātau te hoa pātui o te Karauna mō te whakarauoratanga o te reo Māori.
Hei tā te Tiamana Takirua a Reikura Kahi e mārama tahi ana rāua ko Mātai Smith o taua rōpū ki te whakarite ka rongohia ngā whakaaro o te iwi Māori, ā, ka whāia hei whakarei ake i te tuakiri o te iwi me te Māori i te roto i ngā iwi.
"Ko tā mātou matakitenga, Kia ūkaipō anō te reo, ko te whakarauora i te reo Māori hei reo tuatahi i te kāinga.
"Kua kite mātau i te piki o te pūmautanga ki te reo Māori i roto i te ao pāpāho, i runga pouaka whakaata, i rō toa hokomaha me ngā puoro onāianei, nō reira ka tika kia tahuri atu ki roto i ngā hapori e noho ana, e mahi ngahau ana ngā whānau te mahi mō te reo Māori ināianei."
Mā te tautoko hoki a Te Manatū Waka me Te Taura Whiri i te Reo Māori, ka tuarihia ngā tohu whakamutunga kia kōrerohia e tētahi rōpū whānui ake ā-iwi, ā-Māori me ngā Kaunihera, ka riro mā rātau e whakauru haere i ngā tohu ki ngā rori. E herea ana kia whakawhitiwhiti kōrero tūmatanuitia anō i te mea he whakarerekētanga whaimana ēnei tohu ki te Ture.
Hei tā te Whakataka o Waka Kotahi a Kane Patena ko te whakakitenga a Waka Kotahi ki te tautoko kia kitea, kia kōrerohia te reo Māori kei te hāngai ki Te Mātāwai.
"Kua hihiri katoa mātou i te ihi, ngā pūkenga me te pūmau ki te reo Māori kua kawea mai e Te Mātāwai ki te tēpu. Ko tā mātou e tūmanako ana hei Rōpū Pātui ka ū tonu mātou ki ngā uara o te kotahitanga me te manaakitanga.
"Kua whakamahia ngā tohu reorua ki ngā rori mō tētahi wā engari mā te kōkiri haere tonu i ēnei tohu i te wā kotahi ka āwhina kia ōrite ake, kia ngāwari te utu me te whakamahi haumaru puta noa i Aotearoa."
Ko te tūmanako i tēnei wā ka whakatinanahia ngā tohu reorua i te wā e kōkirihia ngā kaupapa hou, ina whakakapia rānei ngā tohu tawhito, pakaru rānei.
I whakaputaina he huinga tohu Kura School kia kōrerorerohia ngātahitia e te iwi whānui i te pito o tērā tau. Kei te whiriwhiri te Minita o Te Manatū Waka i ngā kōrero tohutohu a ngā āpiha hei whakatau i tētahi huringa ki te ture. Ka whakaputaina he kōrero ā tōna wā, ā, kei roto i tēnei ko ngā takotoranga whakamutunga mō ngā tohu.
Kua whakahautia e Waka Kotahi he rangahau hei tautuhi i ngā tauira kei tāwāhi me te āta tirotiro i ngā pānga haumaru o ngā tohu reorua. He maha ngā whenua e whakamahi ana i ngā tohu reorua, ā, kāore i kitea he whakaaturanga e tohu ana i piki te maha o te hunga i mate, i whara kino rānei nā ngā tohu reorua i ngā wāhi i inea tēnei (hei tauira i Kotirana).
Ngā rangahau mō ngā tohu reorua(external link)
Kia mōhio: Ko ngā mema o te Rōpū Pātui He Tohu Huarahi Māori ko Tiamana-Takirua o Te Mātāwai a Reikura Kahi, Mema poari a Mātai Smith, Te Tumu Waeture o Waka Kotahi a Kane Patena me te Kaiwhakahaere Matua o Waka Kotahi a Māori Nicholas Manukau.
Tapanga whakaahua: Ngā mema o te Rōpū Pātui He Tohu Huarahi Māori ko Tiamana-Takirua o Te Mātāwai a Reikura Kahi, Mema poari a Mātai Smith, Te Tumu Waeture o Waka Kotahi a Kane Patena me te Kaiwhakahaere Matua o Waka Kotahi a Māori Nicholas Manukau tētahi o ā rātau hui tuatahi.
Mō te roanga o ngā whakamahuki, īmēra mai ki whakapa@tematawai.maori.nz