Australasian award for Kura School bilingual traffic signs change
Media release
Kua riro i te hinonga o ngā tohu waka reorua mō ngā kura, nā Te Mātawai me Waka Kotahi, he whakamānawa Ahitereiriana mō te whai wāhitanga.
I toa te hinonga nei i te whakamānawa i tētahi hui i Piripane, Ahitereiria nā te International Association for Public Participation i te Australasia Core Values Award i te Wenerei te 25 o Oketopa.
E whakamihi ana te whakamānawa nei i te ara tuku kōrero i te tau 2022 i para ai i te huarahi kia huhua ngā momo tohu ‘Kura’ ka whakatūtū haere i ngā huarahi puta noa i Aotearoa.
I te hinonga nei, i nui te whai wāhi mai o ngā hapori Māori, o ngā mātanga reo, o ngā manatū whakahaere waka, o ngā ahumahi, me ērā atu o ngā kiripānga ki te whakawhanake me te whakatū haere i ngā tohu waka reorua mō ngā kura. Mā roto i Te Mātāwai i āhei ai ngā iwi, ngā hapū, me ngā mātanga reo ki te whakapuaki i ō rātou whakaaro.
Hei tā te Heamana-Takirua o Te Mātāwai, hei tā Reikura Kahi, he tauira pai te hinonga rā o te noho rangapū, me te aha, hua ake ana te whai wāhitanga mai o te hapori me te kōkiritanga hoki o ngā mahi whakarauora reo i ngā hapori.
“Mā te whai wāhitanga mai o ngā hapori Māori ki te hoahoa me te whiriwhiri i ngā tohu reorua mō ngā kura, ka whakaaturia rā i ngā tohu ō rātou mātāpono, ō rātou mariutanga, me ō rātou wawata. Kua whai arawātea hoki kia nui ake ai te kitea me te kōrerohia o te reo Māori e ngā tāngata o Aotearoa i ia rā.”
I roto i te ara tuku kōrero mō ngā tohu kura, i 90% te tapeke o te hunga whakaae ki ēnei tohu.
Hei tā te , hei tā Chris Bunny, he mea waiwai tā te Māori ārahi i tana whai wāhi mai.
“E hiahia ana ahau ki te mihi ki Te Mātāwai me ngā poari ā-rohe, mei kore ake tā rātou ārahi, tā rātou whakakitenga ka kore nei mātou e āhei ki te tūhono atu ki ngā mātanga reo me te tuari i ō rātou whakaaro mō tā rātou taonga, arā, mō te reo Māori,”
“Nā te mahi tahi ki ngā mātanga marutau me ngā mātanga waeture, kua mōhio mātou e marutau ana ngā tohu ka whakatūria e mātou. Nā konā, ka kite, ka pāhekoheko tahi ngā tāngata o Aotearoa ki te reo Māori i ngā huarahi huri noa i Aotearoa.”
E whakamihi ana te IAP2 Australasia Core Values Awards i ngā hinonga me ngā umanga ko ō rātou ihu kei mua mō te whai wāhitanga mai o te pāpori whānui me te hapori. I whakamihi ngā kaiwhakawā i te hinonga tohu reorua mō ngā kura i te auaha me te kauawhi o te rautaki i whai wāhi mai ai te Māori me tana whakatairanga i te reo Māori hei reo ora.
He kōrero whakamārama:
He wāhanga ngā tohu Kura nō te hōtaka He Tohu Huarahi Māori e whai ana kia whakatūria mai ngā tohu waka reorua i Aotearoa. Kāore anō kia puta te whakatau mō ngā huinga tohu reorua i tukuna ki te pāpori whānui hei ara tuku kōrero mā rātou i roto i te tau. Mō te roanga atu o ngā pārongo, toro atu ki: He Tohu Huarahi Māori bilingual traffic signs programme | Waka Kotahi NZ Transport Agency (nzta.govt.nz)(external link)
Ko IAP2 tētahi tōpūtanga mema nō tāwāhi e whai ana kia whakatairanga, kia whakapai ake hoki i ngā tukanga o te whai wāhitanga e whai pānga ana ki ngā whenua katoa huri i te ao. Ka whakawhiwhia atu e IAP2 ētahi whakamānawa i ia tau mō te Tauira Tiketike, e mōhiotia nei ko Core Values awards. Mō te roanga atu o ngā pārongo mō te IAP2 Australasia Core Values Awards, tēnā, toro atu ki IAP2 Australasia: 2023 Core Values Awards - IAP2 Australasia(external link)